ඉන්දියාවේ මධ්‍ය ප්‍රදේශ් හි ප්‍රතිවාදි ගම් දෙකක වැසියන් ගල්ගසා ගැනීමේ සිරිතට තහංචි

ඉන්දියාවේ මධ්‍ය ප්‍රදේශ් ප්‍රාන්තයේ සියවස් ගණනාවක් තිස්සේ පවත්නා ප්‍රතිවාදී ගම්මාන දෙකක පිරිස් ඔවුනොවුනට ගල් ගසා ගැනීමේ සම්ප්‍රදාය බලධාරීන් විසින් තහනම් කැර තිබේ.

බොහෝ විට සහභාගිවන්නන්ට තුවාල ගෙන දෙන හා සමහරවිට මරණය පවා සිදුවන “ගොක්මාර් උත්සවය” නම් මෙම ගල්ගසා ගැනීම සිදු කරන්නේ දෙගං මැද්දේ පිහිටි ගඟ මැද නැගුනු ගසක් අත්පත් කැර ගැන්මට ගම්මාන දෙකේ කණ්ඩායම් උත්සාහ කිරීම සමගය.

ගම්මාන දෙකට අයත් තරුණ පෙම්වතුන් යුවළක් පැනයාමට තැත්කිරීමේ දී දෙපාර්ශවයේම අය ගල් ගසා ඔවුන් මරණයට පත්කිරීම අනුස්මරණය කිරීමට මෙම ගල් ප්‍රහාර එල්ල කැර ගැනීමේ සිරිත පවත්වන බව පැවසී තිබේ.

හිමියා මිය ගිය පසු බිරිය ඔහුගේ දර සෑයට පැන ජීවිතය පූජා කරන සති පූජාව ද දැන් තහනම්ව ඇති බැවින් මෙම අමානුෂික සිරිත ද තහනම් කරන බව බලධාරීන් කියා ඇත.

අදාළ ගොත්මාර් උත්සවයට පිරිමි පමණක් සහභාගි වන අතර වාර්ෂිකව අගෝස්තු හෝ සැප්තැම්බරයේ දී එය පැවැත්වීම සිරිතව තිබිණි.

ගඟ මැද නැගුණු ගසේ ඇති ධජයක් ගලවා ගන්නා පුද්ගලයා අයත් ගම්මානය මෙම උත්සවයේ දී ජයග්‍රහණය අත්පත් කර ගන්නා බවත් දුර්ගා දෙවියන් යදිමින් සිදුකරන ගල් ගසා ගැනීමෙන් ඇතිවන තුවාල සුව වීමට පසුව ඔවුන් පූජනීය අළු ගල්වන බවත් සඳහන් ව තිබේ.

පසුගිය කාලයේ තුවාල ලත් වුනට අවශ්‍ය ප්‍රතිකාර විදි සපයමින් බලධාරීන් ද ඊට අනුග්‍රහය දැක් වුවද කීපවරක් ම මරණ සිදුවීම නිසා ගල් වෙනුවට රබර් බෝල ආදේශ කිරීමට ගත් ප්‍රයත්න ප්‍රතික්ෂේප වීමෙන් පසු දැන් මෙසේ තහනම් කැර තිබේ.